🪜 خطوات بناء شعار أ ب ت

في البداية في توضيح بسيط .. أنا سميت المقال أ ب ت .. عشان هذا المقال أبدا ماراح يعلمك كيف تسوي شعار بعد ماتخلص من المقال .. لكن المقال راح يعطيك المفتاح 🔑 عشان تعرف كيف يتم بناء وتصميم الشعار وأيش هو الشعار أساساً وليش الناس تحتاج شعار ولما أبغى اصنع شعار ايش احتاج في البداية عشان أقدر اسوي شعار .. وبس والله 😊

ايش هو الشعار؟

عشان نبني شعار بشكل صحيح لازم نعرف ايش هو الشعار .. الشعار هو عبارة عن رمز يميز شيئ عن غيره. يعني ممكن نعمل شعار لاي شي نبغاه لكن لازم نعرف ايش الهدف اللي راح نعمل الشعار عشانه وهذا ينقلنا للموضوع الثاني

ليش نسوي الشعار؟

تختلف الاهداف من مشروع لمشروع من شخص لشخص ولكن في غالب الاحيان يكون الهدف هو تمييز منتج أو خدمة أو شركة أو اي شي عن منافسيه .. يعني على سبيل المثال خدمة راقي من موبايلي لها شعار نصي وشعار لفظي يميزها عن بقية الخدمات وكذلك مكتبة جرير لها شعار يميزها عن بقية المكتبات وهكذا…

فالشعار الغالب منه تميّز الشيء عن غيره .. ومن هذا المنطلق طلع لنا انواع للشعارات تتميز فيها بعض الأشياء عن بعض فتجد مثلا أغلب الوزارات في السعودية يدخل فيها النخلة أو السيف والنخلة أو اللون الأخضر الحاجات اللي ترمز للمملكة العربية السعودية فتميزت الوزارات بهذا النمط (الأغلب مو الكل) كذلك تجد الشعارات التعليمية تحتوي على الرموز اللي تدل على العلم مثل الكتاب أو الصفحة أو القلم وغيرها وهذا ينقلنا للموضوع التالي وهو ايش هي انواع الشعارات

أنواع الشعارات

بحكم تنوع الأشياء اللي نسوي لها شعارات تتنوع الشعارات اللي نسويها .. فمثلا تصميم شعار لروضة أطفال يختلف تماما عن تصميم شعار لجامعة أو شعار لمركز تدريب ليييش ؟؟ السبب هو الفئة المستهدفة .. في الروضة نستهدف أولياء الأمور فنصنع شعار يوضح أن المكان مناسب للأطفال والشعار بشكل عام يكون بعيد عن الرسمية عشان يحقق هذا الهدف وبالنسبة للجامعات الموضوع مختلف لازم الشعار يكون رسمي ويعكس جدية التعليم وجودته وكذلك تمثيل الجامعة في المؤتمرات والمناسبات سواء المحلية أو العالمية عشان كذا في صناعة شعارات الجامعات في الغالب يحرصوا ان الشعار يكون موزون واضح ورسمي جدا.

نخرج من التعليم وننتقل للمطاعم على سبيل المثال .. المطاعم أنواع منها الفخم اللي أسعاره غالية وديكوره متكّلف .. ومنها المتوسط في كل شي ومنها اللي مشي حالك .. قبل ماتصمم أو تصنع شعار لازم تعرف الشيء اللي راح تسوي له الشعار فين موقعه من الإعراب ومين راح يكونوا الفئة المستهدفة عشان تصمم شي يناسب النشاط ويناسب الفئة المستهدفة من الخطأ جدااا انك تصمم شعار يدل على الفخامة لمحل عادي جدا أو تصمم شعار عادي جدا لمحل فخم ويستهدف طبقة راقية كذا غالبا بيخرب السوق – لكن مو سبب رئيسي – من الأسباب .. وأنت دورك كمصمم انك تساهم في صناعة حل للمشكلة مو تكون جزء من المشكلة 😅 طيب السؤال اللي راح يجي الآن في بالك .. عرفت ايش الشعار وليش لازم يكون في شعار او مايكون في شعار وكيف اختار نوع الشعار .. كيف أبدأ أصنع شعار الان؟؟؟

مراحل بناء الشعار

مراحل تصميم الشعار تحتاج مقال لحالها .. ولكن راح أذكر لكم بشكل مختصر ايش هي المراحل .. وفي مقال ثاني راح أتكلم عن الخطوات بتفصيل أكثر .. في البداية أنت كمصمم حتكون الدليل لطالب الخدمة – العميل- أو الشخص اللي طالب الشعار .. غالبا إذا كان العميل فاهم راح يريحك ويقولك هو بالضبط ايش يبغى .. وأحيانا يكون يبغى شعار لكن مو عارف ايش هو الشعار ولا كيف لازم يكون ولا أي شي ويقلك المقولة الشهيرة أنت سوي الشعار واحنا نقرر .. وهنا أنت كمصمم شعارات تكون في ورطة لان العميل في باله في شي بس موعارف كيف يوصله لك ..

هنا نجي عند أول مرحلة من مراحل بناء الشعار وهي معرفة رغبات العميل .. إذا كانت الرؤية واضحة والطلبات محددة ودورك أنت تحول الرغبة والطلبات لمنتج بصري موزون مرتب يحقق الأهداف الحمدلله ..

أما اذا جينا عند النوع الثاني اللي مايعرف ايش يبغى هنا أنت لازم تشغل المحقق المصمم اللي في داخلك عشان تخلي العميل يعرف ايش يبغى .. فتسوي نموذج بناء الهوية أو نموذج بناء الشعار .. تسأل العميل فيه عدة أسئلة تفهم منها طلباته .. تقدر تستفيد من النموذج اللي أنا عامله إذا حبيت .. بعد مايخلص العميل من تعبئة النموذج لازم تفهم النموذج بشكل كويس جدا وتراجعه مع العميل عشان تكونوا انتم الاثنين في الصورة .. بعد ماتحس انك فهمت تمام ايش يبغى منك العميل ووصلت لنقطة اتفاق بينكم .. خليه معاك أول بأول أثناء العمل .. يعني مثلا وأنت ترسم الاسكتشات وخلصت وريه الاسكتش اللي حاب تشتغل عليه ووضح له الفكرة من الاسكتشات ولااااازم توضح للعميل ان الاسكتش هذا عبارة عن رسم على ورقة و أنه أبدا مو المنتج النهائى عشان لاتجيه صدمة 😅 وبعد ماتخلص من رسم الشعار على الالستريتور من غير ماتوزن الشعار ولا تختار الخط المناسب ارسل صورة للعميل قله حبيت اني اشارك معاك مراحل بناء الشعار .. هذا يحتاج مثلا إلى إعادة نظر في الالوان والخطوط وووو الخ .. وشوف ردة فعله وايش يقلك وبعد ماتخلص من وزن الشعار واختيار الالوان المناسبة والخط المناسب وكيف راح يطلع الشعار بالطول وبالعرض وبالألوان وباللون الأسود والأبيض .. وكل شي كمان أرسله وقله هذا الشعار النهائي إذا كل شي تمام .. الحمدلله رب العالمين ..

كذا خلص أصعب جزء في عملية بناء الشعار .. نجي ألان لمرحلة تصدير العمل .. الشعار من وجهة نظري لازم يكون فيكتور vector يعني ماتسويه بالفوتوشوب عشان يكون عندك مساحة تكبر وتصغر الشعار على راحتك بدون ماتواجه أي مشكلة ان الشعار ممكن يغبش أو تقل جودته .. لما ترسل الشعار للعميل أعطيه كل الصيغ اللي ممكن يحتاجها مو بس تعطيه الصورة عشان أغلب العملاء مايعرف الفرق بين ملف الالستريتور وصور png وأي أحد يطلب الشعار يرسل له الصورة .. عشان أتفادى هذه المشكلة عملت مجلد على قوقل درايف احط فيه الشعار بكل الصيغ اللي ممكن يحتاجها العميل وارسل له الرابط يسير أي أحد يحتاج الشعار سواء مصنع أو مطبعة ياخذ الرابط ويلاقي الشعار بالصيغة اللي يحتاجها .. في الغالب اسلم العميل الشعار بالصيغ التالية :