نبذة عن زيد

مرحبا .. أنا زيد التوخي ماجستير في هندسة تحليل البيانات في جامعة جورج ميسون George Mason University محاضر بكلية الحاسب الآلي ونظم المعلومات بالجامعة الإسلامية مصمم جرافيك واحب التصميم وخصوصا تصميم الشعارات والهويات البصرية وتصميم المواقع الالكترونية أعطيت عدد بسيط من الدورات في التصميم تقريبا ٤ او ٥ دورات

 🖥 أيش هذا الموقع؟

بشكل سريع هذا الموقع بكتبه بلغة بسيطة غير متكلفة ممكن تلاقي كلمات باللغة العامية وممكن تلاقي اخطاء لغوية بسيطة بس إذا لقيت خطأ لغوي فادح ياليت تعطيني خبر عشان اعدلة << زي الكلمة هذي مثلا خطا فادح جداااا 

من زمان وانا في بالي موضوع انو لما احتاج شي على طول اكتب في قوقل والاقي الناس كاتبين عن تجاربهم .. طيب متى يجي اليوم اللي ممكن افيد فيه غيري؟؟ وكيف ممكن اسوي شي مفيد؟؟ من هنا طلعت فكرة الموقع ..

حكتب عن أي شي احس اني ممكن أفيد فيه غيري حتى لو ماكنت خبير في هذا المجال راح اكتب اللي اعرفه إذا كان صح الحمدلله وإذا كان خطاء ياليت تقلي عشان نتناقش فيه وأعدل واكتب ايش الصح عشان غيرنا يستفيد. راح احاول اكتب كل ماجاتني فرصة لكن بتحدى نفسي اني اكتب كل اسبوع مقال في اي مجال من المجالات اللي ممكن اكتب عنها ..

بعض الأشياء اللي راح اكتب عنها التصميم الجرافيكي بحكم أني مصمم من ٢٠٠٦ تقريباً وأعطي دورات من عام ٢٠١٣ تقدر تقول أني ممكن اتكلم بشكل كبير في التصميم و “اتفلسف” براحتي، في قسم التصميم الجرافيكي حتلاقي مقالات أنا كتبتها ومقالات كتبها غيري حسيت إن فيها حاجة جديدة ومواقع وقنوات تعليمية وكمان نماذج من التصاميم اللي عملتها اللي يارب تعجبك.

حتكلم كمان عن التطبيقات والخدمات اللي استخدمها في الابتوب والجوال والايباد بشكل يومي وبتخلي حياتي اسهل “على فكرة انا أغلب المنتجات التقنية اللي استخدمها من شركة أبل

كمان راح اتكلم عن مواضيع تقنية مختلفة من ضمنها تحليل البيانات وخواطر وافكار وغيرها

أنا ما أصنف نفسي إني قارئ نهم ولكن أحب اقرا كل ماجاني وقت فاضي وأي شي يعجبني أكتبه على جمب لكن محد بيستفيد من الحاجات اللي بكتبها عشان كذا قررت اني اضيفها هنا لعل وعسى أن يستفيد منها أحد

وأخيراً .. هذا موقع شخصي وأغلب اللي راح تقراه بيكون من أفكاري وقناعاتي.

وأتمنى يعجبك المحتوى والأهم يارب تستفيد لو على الاقل معلومة وحدة جديدة حكون حققت الهدف من هذا الموقع.

وشكرا..