📝 Notion

سواء كنت طالب أو مصمم أو موظف .. notion راح يكون صديقك الذي لاغنى عنه بشرط انك تكون شخص يحب يرتب أموره

ايش هو Notion ؟

هو برنامج أو تطبيق يقدم لك العديد والعديد من المميزات اللي تقدر تسويها فيه .. شخصيا استخدمه بشكل يومي في ترتيب أمور حياتي بشكل عام من الدراسة لطلبات التصميم والأمور المالية من اشتراكات وفواتير وغيرها .. يعني شخصيا فعلا اعتبره عقل ثاني .. ويستخدم مع الناس اللي حابة تطور انتاجيتها وترتب امور حياتها

ايش هي المميزات اللي يقدمها Notion ؟

من الصعب جدا اني احصر المميزات في مقال واحد .. ولكن من المميزات اللي خلتني اداوم على اني كل يوم ادخل Notion هي كثرة الخيارات اللي يتيحها لك التطبيق مثلا: تقدر تستخدمه كمكان لملاحظاتك ، أو ترتب فيه المهام، إدارة المشاريع ، وتقدر تسوي جداول وإذا انت لك في البرمجة شوية تقدر تبرمج الجدول بحيث يعرض لك اشياء متقدمة ..

إذا انت شخص تحب ترتب حياتك وكل شي يكون مرتب وماتجيك مفاجأت صدقني Notion راح يكون صديقك اللي كل يوم راح تتواصل معاه

وأحلى ميزة أن التطبيق مجاني واستخدامه بالكامل مجاني ولكن إذا دخلت حتلاقي ان في خانة للاشتراكات .. النسخة المجانية تتيح لك انشاء عدد لانهائي من الصفحات والمحتوى ولكن الفرق بين النسخة المجانية والمدفوعة هي في حجم الملفات اللي ترفعها بحيث يكون أقصى حجم لكل ملف هو ٥ ميجا .. لكن إذا انت طالب أو معلم ممكن تاخذ النسخة الشخصية اللي هي بحوالي ٥ دولار شهريا بشكل مجاني بشرط يكون عندك إيميل تعليمي يعني فيه .edu وبالتالي حتحصل على النسخة المدفوعة اللي تسمح لك تحمل ملفات حجمها أكبر من ٥ ميجا وكمان تقدر تسترجع النسخ إلى شهر يعني لو عدلت وبعدين قررت تشوف قبل شهر كيف كانت الصفحة راح تقدر، بالنسبة للنسخة الثالثة وهذي للي حاب يستخدم التطبيق في مجال العمل بحيث تقدر تخلي كل فريق العمل معاك في المشروع وتسند لهم مهام وتتابع
المشاريع معاهم أول بأول الخ ..

كيف اسوي حساب وأبدأ؟

تقدر تحمل التطبيق من أي متجر سواء ابل ستور أو Google Play وتسوي حساب وتنطلق ولكن انا انصح انك تبدأ من جهاز الكومبيوتر عشان يكون أسهل واوضح لك

لتحميل التطبيق على الجهاز المكتبي أو الابتوب اضغط هنا .. لكن زي ماقلتلك أول شي سوي الحساب على الجهاز المكتبي أو الابتوب وجهز الصفحات وبعدين تقدر تشتغل على التطبيق بشكل سلس .. عشان تسوي الحساب اضغط هنا وبعدين من فوق اضغط على Sign up إذا عندك ايميل دراسي سجل فيه أو سجل دخول عن طريق جوجل إذا تفضل هذه الطريقة .. بعد ماتسوي الحساب أبدأ بانشاء صفحاتك .. شخصيا استغرقت مايقارب ٥ ساعات أجهز التطبيق للاستخدام اليومي ماواجهت أي صعوبات في ترتيب الصفحات وانشائها وانشاء الجداول .. على فكرة التطبيق يحتوي على عدد لابأس به من القوالب اللي ممكن تستخدمها كبداية بس بعد كذا انت راح تسوي الصفحات بالشكل اللي تحبه ..

قبل ماتبدا

نصيحة أخيرة قبل ماتتحمس وتبدا تشتغل على Notion وتشوفه معقد ومليان وتسيبه، افضل انك تشوف الفديوهات اللي تحت 👇🏻عشان لا تحوس وانت تدور على فديوهات تشرح لك التطبيق ومميزاته وكيفة استخدامه والمجالات اللي ممكن تستخدم Notion فيها .. أنا اختصرت عليك المشوار وهذي الفديوهات اللي انا استفدت منها .. شوفها عشان توضح لك المميزات بشكل اسهل وكمان تشوف كيف طريقة عمل التطبيق وكيف انه يقدم لك تجربة مميزة وفريدة .. وماتتوه في البداية .. وكمان عشان تاخذ افكار من الناس كيف اشتغلوا ع التطبيق وتستفيد من الافكار الكثير الموجودة في الفديوهات .. خذ اللي تحتاجه واللي ماتحتاجه خليه 😅 ..

بعض الفديوهات طويلة وفيها مقاطع مملة إذا حسيت بملل عدي شوية الين توصل عند نقطة تحس انها تفيدك ..