🤔 هل الايباد يغني عن الابتوب؟؟

كثير سألوني هذا السؤال .. كل ماشافوا اعتمادي الكبير جدا ع الايباد
والجواب دايما يكون .. “على حسب شغلك .. واحتياجاتك”

إذا كان شغلك تصفح للانترنت وقراءة مقالات واخبار وكتب وكتابة بشكل اساسي  .. يعني شغلك مافيه أي تعقيدات ولا يحتاج خصائص معينة في البرامج ولا تصميم وبرامج هندسية وكذا .. في هذه الحالة اقلك ان الايباد بديل ممتاز 👍🏻 ويمكن اكثر من ممتاز من للابتوب 💻 ..

🧐 طيب ليش معاك لابتوب وآيباد؟؟

الايباد شخصيا استخدمه في عدة امور .. مثلاً معايا لما اخرج من البيت دااائما .. .. اذا لقيت وقت فراغ اطلعه واكتب أي فكرة أو حتى فكرة مقال أو ارسم يعني لو خرجت من غير الايباد يكون في شي ناقص …

وفي الدراسة معتمد عليه بشكل كبير جدااا 📝.. كل الكتب والمقالات والواجبات وشرائح البوربوينت كلها في الايباد يعني مذاكرتي 99.99٪ من الايباد.. لكن احيانا في مواد تتطلب اني استخدم للابتوب 😅 عشان احل بعض الواجبات اللي تتطلب برامج معينة ماتسير نهائيا الا باللابتوب 💻 ..

نفس الشي برامج التصميم 🖼.. إذا كنت مصمم، الايباد راح يكون مساعد لك ومساعد كويس جدًا بس أبدا ماراح يكون بديل .. يعني مثلا تقدر ترسم الاسكتشات على الايباد وبسهولة تنقلها للابتوب .. وممكن على طول يكون الاسكتشات عبارة عن vector فماراح تتعب في التعديل وانك لازم ترسم الاسكتش من جديد.. أو ممكن تسوي تصاميم بسيطة ..

🤔 ملحقات الايباد هل هي ضرورة؟

أشهر ملحق للايباد هو القلم .. شخصيا ما اتخيل اني استخدم الايباد بدون القلم .. لأن اكثر استخدامي للايباد هو لكتابة الملاحظات إما من الكتب أو شرائح البوربوينت أو ملفات pdf أو اني أرسم سكتشات لشعارات أو تصاميم أو يكون عندي مسألة معقدة فاكتبها بيدي على الايباد عشان مثلا اسوي خريطة ذهنية تبسط المسألة .. وبالتالي القلم بالنسبة لي جزء لايتجزا من الايباد

نجي للكيبورد .. انا استخدم الكيبورد العادي مو magic keyboard الموجود في الصورة ع اليسار لاني اتوقع ان الكيبورد العادي اكثر من كافي بالنسبة لي بحكم اني ما استخدم الكيبورد بشكل كبييير جدا على الايباد واغلب الكتابة اللي اكتبها تكون على اللابتوب  .. إذا حكتب ع الايباد غالبا بيكون في Notion أو Bear و غالبا أكون بأكمل كتابة او للمراجعة .. عشان كذا من وجهة نظري الكيبورد العادي مناسب جدا ويفي بالغرض بالنسبة لي .. لكن انت اذا الكتابة عندك تعتبر شي مهم واساسي وحاب أن الايباد يكون الجهاز الأساسي .. هنا وقتها أقلك ممكن يكون magic keyboard يعتبر شي يستاهل انك تقتنيه..

في ملحق ثاني وهو الماوس .. في التحديثات الاخيرة للايباد سار يدعم الماوس وهذا الشي جعل تجربة استخدام الايباد افضل بمراحل .. ممكن تستخدم أي ماوس يدعم البلوتوث ولو عندك كيبورد بلوتوث تقدر كمان تستخدمه في الايباد ..

وبما أن الايباد سار يدعم قراءة الملفات من الذواكر الخارجية هذا يحطك قدام حل من الاثنين اما تشتري فلاش يكون usb-c او تشتري محول زي الصورة الموجودة تحت ع اليسار ..  وعلى فكرة في انواع واشكال من هذه المحولات لكن انا نصيحتي خذ ابو سلك افضل من النوع اللي يركب مباشرة على الايباد، ولو ان شكله افضل .. لكن من ناحية عملية السلك افضل.

سعر الايباد والملحقات = سعر لابتوب بمواصفات كويسة جدا ..

صحيح سعر الايباد والملحقات الخاصة فيه فيها نوع من الارتفاع .. لكن زي ماقلت في بداية المقال .. الموضوع يعتمد على احتياجك .. يعني ممكن تاخذ الابتوب اللي يكون بنفس سعر الايباد والقلم والكيبورد بس تبلش فيه وفي نقله من مكان لمكان وتشيل الشاحن وتدور مكان فيه كهربا عشان تشحن الابتوب .. وانت استخدامك فقط قراية وتصفح انترنت .. الايباد عكس الابتوب .. خفيف وسريع والمعالج المستخدم فيه يعتبر أقوى من معالجات بعض لابتوبات الموجودة في السوق وشاحنه يستمر أكثر من الابتوب واذا احتجت شاحن بنوك الطاقة ماتقصر معاك في شي .. يعني قيم احتياجاتك واعرف ايش تحتاج .. هل تحتاج لابتوب ولا تحتاج ايباد ..

هل في بدائل للايباد بسعر ارخص؟

إذا بحثت بتلاقي أجهزة لوحية من شركات ثانية زي سامسونج هواوي وغيرها تقدم لك أجهزة لوحية تدعم القلم والكيبورد ويمكن يكون أداءه كويس ويفي بالغرض لكن اللي يبغى نظام iOS لازم ياخذ الايباد عشان يستفيد من جميع المزايا اللي تقدمها ابل مثل iCloud ، AirDrop وغيرها وخصوصا لو كانت اجهزتك كلها من شركة أبل الفوائد والمميزات بتكون مضاعفة .. وكمان ابل تقدم لك أجهزة مصنعة بمواد قوية ونظام مستقر جدا والأمان فيه يعتبر أعلى من باقي الشركات ..

اخر نصيحة : شوف انت ايش تحتاج .. واتوكل على الله

وسلامتكم 🙂

جميع الصور المستخدمة في المقال من موقع https://www.bestbuy.com

20 April 2021