❓كيف طورت لغتي الانجليزية

السلام عليكم .. في هذا المقال راح اشرح لكم كيف طورت من لغتي الانجليزية قبل ما أروح أمريكا وبعد مارحت أمريكا ..

قبل ما أسافر امريكا 🇸🇦

1️⃣ في البداية .. كان عندي قناعة أن أي شخص عنده القدرة أنه يتعلم أي لغة زي ما الاطفال يتعلموا اللغات .. فأول خطوة هي السماع .. كان
الطريق الافضل بالنسبة لي هو تطبيق podcast الموجود في أجهزة apple واشتركت في قنوات تعليم اللغة الانجليزية وقنوات اخبارية للمبتدئين ..
2️⃣ الشي الثاني اللي سويته عشان احسن الاستماع هو أني كنت اتفرج الفيلم أو المسلسل الأمريكي بالترجمة العربي وبعد فترة يعني شهر شهرين ارجع اتفرج الفيلم بدون ترجمة، في هذه المرة انا فاهم القصة ولكن بيكون تركيزي مع الكلام والنطق أكثر ..

إلى هنا حسيت الاستماع عندي اتحسن كثير وسرت افهم المنطوق بشكل افضل لكن ما اخذت أي خطوات في تطوير القراءة 📖 أو الكتابة 📝 أو التحدث 🗣 كان فقط استماع

بعد ماسافرت أمريكا 🇺🇸

بعد ماسافرت أمريكا 🇺🇸 ودخلت معهد اللغة كان INTO Mason University الصراحة المعهد قوي جدا ويعاملك تقريبا انك طالب جامعة مو شخص جي يتعلم لغة .. كان تركيز المعهد كثير على القراءة والكتابة الأكاديمية .. وأقل شوية في التحدث والاستماع ..

المعهد للأمانة على الرغم من أنهم كانوا شديدين والتعليم مافيه لف ودوران إلا اني كنت احس انه مايعطيني أكثر من ١٠-٢٠٪ من اللغة وان في مشكلة في موضوع اللغة .. بعد ماعدا أول ترم لي في المعهد (كان المستوى الرابع) .. عرفت اني لازم انا اعتمد على نفسي في التطوير واخلي المعهد مساند لي .. رجعت للبودكاست 📻 بس المرة هذي اضفت ٣ حاجات جديدة 😁
1️⃣ قراءة من المواقع الاخبارية وبعض الكتب الصغيرة 2️⃣ اشتركت في برنامج Cambly, واخيرا 3️⃣ سرت اكتب أي شي قدامي أو حدث حصل

كيف طورت القراءة؟ 📖

في ٣ أمور ساعدتني في تطوير القراءة

📚 كنت أقرا كتب الاقيها في المعهد في مكتبة صغييرة أو ممكن تقول دولاب صغير كان فيه كتب كنت اخذ كتاب واقراه وقت البريك اقرا بين ١٠- ١٥ دقيقة إذا كان عندي فرصة .. كان الكتاب ياخذ اسبوع إلى اسبوعين، حتى لو ماخلصته اشوف غيره، في البداية كنت افهم من ٤٠-٥٠٪ من الكتاب يعني افهم الصورة الكبيرة اللي يبغى يوصلها الكاتب بس التفاصيل الصغيرة ماكنت افهمها، بسبب اني كنت اترجم الكلمات اللي ما اعرفها وأحاول احفظ اللي أقدر عليه اتحسنت قدرتي على القراءة بشكل كبير .. وسرت افهم بشكل افضل

📰 بالاضافة إني كنت اقرا الاخبار بشكل كبير جدا وبحكم اني شخص احب التقنية كنت اقرا الاخبار التقنية .. والشي الكويس في قراءة الاخبار انو كان ترجمة الكلمات ابسط بكثير من الكتب .. بحكم اني اقرا من الايباد أو الجوال .. لكن في معظم الاحوال كنت احاول ما اترجم واخمن معنى الكلمة واكمل قراءة .. في الغالب معنى الكلمة قريب من المعنى الصحيح ..

🙇🏻‍♂️ بالاضافة إلى دروس القراءة في المعهد .. كانت الكتب المطلوبة مننا جدا كويسة .. في اسلوب تعليم القراءة .. استفدت منها كثير الصراحة ،، وكذلك المعلمين اللي كانوا يدرسونا كانوا كويسين جدا ..

كيف طورت التحدث؟ 🗣

تطبيق Cambly كان هو العامل الرئيسي اللي ساهم في تطوير مهارة التحدث بشكل كبير جدا .. هذا التطبيق باختصار شديد فيه مجموعة من المتحدثين الاصلين بالانجليزي ولغات ثانية .. وانت تدخل وتتكلم معاهم .. والهدف هو انك تتعلم منهم اللغة الانجليزية

اشتراك التطبيق غالي شوية .. لكن يستاهل عن تجربة
سجلت لمدة ٣ اشهر منفصلة في الشهر ٣ جلسات كل جلسة نص ساعة .. وكانت كافية جداً وغالباً كنت اخذها وقت الاستراحة في المعهد .. الشي الجميل في التطبيق أن حتى اذا ماعندك مواضيع هما يفتحوا معاك المواضيع ويخترعوا كلام ولما تغلط يصححلك النطق والقواعد.

احس أني استفدت من التطبيق من ناحية التحدث أكثر من استفادتي من المعهد

كيف طورت الكتابة؟ ✍🏻

بالاضافة إلى الكتابة اللي كنا نكتبها في المعهد .. وكانت كثييرة خصوصا على شخص يبغى يتعلم اللغة الانجليزية لكن كانت مفيدة جدا .. والتصحيح تبع المدرسين كان احترافي والهدف منه تعليمي اكثر من أن يكون فقط تصحيح .. لكن كانت اكاديمية أكثر من انها تعليم الكتابة .. يعني كيف تكتب بحث كيف تكتب مقترح بحث كيف تكتب انتقاد لكتاب وزي كذا..

لكن عشان اطور موضوع الكتابة عندي سرت اكتب اي شي قدامي أو ايش قاعد اسوي في اي وقت فراغ مثلا فترة استراحة وانا في الباص رايح للمعهد أو راجع للبيت .. كنت إذا ما اسمع ولا أقرا كنت اكتب ..

وغالب كتاباتي في الجوال وبعد ما اخلص احذفها >> ما أعرف ليش ماكنت احتفظ فيها 😅

من الامثلة على الاشياء اللي كنت اكتبها : الباص مزدحم .. اليوم خرجت أبدر من امس .. الجو جميل .. نسيت اشحن الجوال ..
حاجات زي كذا الشي الكويس في الطريقة هذي كانت تجيني كلمات ما اعرف معناها بالإنجليزي فابحث عنها واعرفها واعرف الاسبلينج حقها ..

شي كمان 💭

كنت دائما أفكر بالإنجليزي .. فإذا حاب تطور نفسك في الانجليزي دائما فكر بالإنجليزي قد ماتقدر وبكذا تعود عقلك 🧠 على اللغة بشكل افضل

بالاضافة إلى انو من الأفضل عشان تعود نفسك على الإنجليزي خلي كل شي حولك انجليزي لغة الجوال الابتوب تويتر وإذا تكتب مهامك اليومية خليها بالانجليزي قد ماتقدر عود نفسك تكون البيئة المحيطة فيه إنجليزي .. هذا الشي راح يساعدك جداا في تقوية علاقتك بالانجليزي

مرة في دكتور في المعهد قالنا جملة ما أعرف صحتها من عدمها وهي: اليوم اللي تحلم فيه ويكون لغة الحلم بالانجليزي .. انت هنا تشربت اللغة وعقلك بدأ يستقبلها بشكل كويس

هنا بعض المصادر اللي اتعلمت منها واللي اتمنى انها تكون مفيدة لكم

📻 البودكاست

EnglishClass101
BBC Learning English Drama
6 Minute English هذا للمبتدئين .. مرة كويس في التعليم
All Ears English Podcast كلامهم كثير .. بس مواضيعهم حلوة ومفيدة
6 Minute Vocabulary حلقات مختصرة فيها في كل حلقة كلمة جديدة وكيف تنطق وكيف تستخدم
Planet Money حلقات فيها مواضيع مختلفة
TED talks daily بودكاست مو للمبتدئين .. عبارة عن لقاء مع اشخاص اتكلمو في TED ويسألوهم عن تجاربهم وكذا
Go Natural English

📰 مواقع الاخبار

The New York Times – Breaking News, US News, World News and Videos
Tech News & Analysis – Wall Street Journal
bbc.co.uk/learningenglish | يحتوي موقع بي بي سي الخاص لتعليم اللغة الانجليزية على الاخبار بلغة سهلة.
newsinlevels.com | هذا الموقع فيه اخبار بمستويات مختلفة بالاضافة لمقطع فيديو للاستماع للخبر ومحاولة فهم الكلمات الصعبة
VOA | Silicon Valley & Technology